दिवा:- ठाणे महापालिका हद्दीतील मौजे आगासन गावातील खाजगी शेतजमिनीवरील अन्यायकारक आरक्षण तात्काळ हटवण्यात यावे तसेच प्रस्तावित रस्ते गावाबाहेरून घ्यावे यासाठी आगासनगाव संघर्ष समिती च्या वतीने गुरुवारी कल्याण ग्रामीणचे आमदार राजेश मोरे यांची भेट घेऊन या संदर्भात सविस्तर माहिती देण्यात आली.
सदर आरक्षण हे हटवण्यासाठी खासदार श्रीकांत शिंदे व ठाणे महानगरपालिका आयुक्त यांच्याबरोबर गावकऱ्यांची संयुक्त बैठक लावून हा प्रश्न सोडवण्यात येईल असे आमदार राजेशजी मोरे यांनी उपस्थित ग्रामस्थांना आश्वासित केले.
यावेळी आगासनगाव संघर्ष समितीतर्फे आमदारांना निवेदन देण्यात आले. प्रसंगी आगासनगाव संघर्ष समितीचे सदस्य व ग्रामस्थ उपस्थित होते.